سپرلے شولو زمونږ د يارۍ بل کال پورا کیږي

                                                                                                                    (دوست محمد بحر)

سپرلے  شولو  زمونږ  کلي  ته  راشه  للمې ګل دي
زما د زړهٔ کچه   غندل.!  هر  څهٔ  غندل  غندل  دي

سپرلے  شولو   د  شنو  پاڼو  نه  ډکې  دي  کرکڼې
په مینه د  یو  بل   نه  پکښې  خُلې  اخلي   چرچڼې

سپرلے شولوپۍ ډیردي مونږه هره ورځ شوملې کړو
کهٔ تهٔ راغلې د کُچو په ډوډۍ به  چیني  توې  کړو

سپرلے شولو په  اور  ده  کټوۍ  باندې  د  شوتلو
خو  ما  سره  څوک نشته په څمڅۍ کښې د خوړلو

سپرلے  شولو  لالیه   باري  کړې  مې   کټۍ   ده
اخستې   د   ګونګرو   نه   ورله  ډکه  مې پټۍ ده

سپرلے شولو بیا ستا په  انتظار  زما  زړګے  دے
منلے  مې  دا  وار  د   منزري  بابا  چیلے    دے

سپرلے شولو د ژمي یخني  ځي   تاؤدهٔ   زیاتیږي
ستا   ګرمې ګرمې  سترګې   راته  ډیرې رایادیږي

سپرلے شولو دا ستا د زړهٔ دپاره  په  خوارو  مې
زده کړي دي میرګاټي هم زده کړې دہ چیندرو مې

سپرلے   شولو   د زیم مېلې ته دواڼه به پیاده ځو
خبرې   به   اوږدې   کوؤ   په   لاره به اوږده ځو

سپرلے   شولو  په غاړه د جیندي به مازیګر کوؤ
هم   هلته   به   انګتې   شورشر  او  انډوخر کوؤ

سپرلے   شولو  زمونږ  د يارۍ بل کال پورا کیږي
جوړ   سخکالې   د   بحر د مودو سوال پورا کیږي

پہ شکریہ د چشمان موسیٰ خیل