ہم مُردہ قوم ہیں افسُردہ قوم ہیں
(غلام حسین محب)
ہر دردناک اور غمناک واقعہ کے بعد نئے تبصرے اور نئے انکشافات سامنے آتے ہیں ورنہ یہ بات تو اکثر سننے میں آتا ہے کہ یہ سب کچھ پختون قوم کے خلاف ہو رہا ہے لیکن میں اس بات سے اس لیے بھی متفق نہیں ہوں کہ اگر پختون کو نشانہ بنایا جا رہا ہے تو نشانہ بنانے والا یعنی قاتل بھی تو پختون ہیں ،اب سوچنے کی بات ہے کہ پختون کس کے ہاتھ کا کھلونا ہے ؟
سانحہ کوئٹہ میں 62جوان شہید کیے گئے جنہوں نے ابھی عملی زندگی کا آغاز بھی نہیں کیا تھا۔سب جوان تھے نئے ولولے،نئے عزم اور نئی امیدیں لے کر بھرتی ہوئے تھے، مگر ’’ دل کے ارماں آنسوؤں میں بہہ گئے‘‘۔مگر اس نئے منظم حملے نے بے شمار سوالات کو جنم لیا ہے۔
(۱) اتنے حساس اور بدنام روڈ جس پر اس جیسے حملے معمول بن چکے ہیں پر پولیس ٹریننگ سنٹر کی سکیورٹی اتنی کمزور کیوں تھی ؟ (۲) چند روز پہلے فارغ کیے گئے رنگروٹوں کو چٹھی دیدی گئی اور پھر اچانک کیوں بلایا گیا۔؟ (۳) اگر ان کو اسلام آباد دھرنے کے خلاف ڈیوٹی پر بھیجنا تھا تو ان کو اسلحہ کیوں نہیں دیا گیا کیا یہ اسلام آباد میں جاکر کراٹوں سے احتجاجیوں کو روکتے؟ (۴) سینکڑوں جوانوں کی ٹریننگ والا سنٹر جہاں پولیس کو لڑنے کے لیے ٹریننگ دی جانی تھی کے ارد گرد کوئی سکیورٹی انتظام نہیں کیا گیا تھا؟ (۵) واقعے کی سکیورٹی کے ذمہ داروں کے خلاف کوئی تادیبی کارروائی ہوگی بھی یا سانحۂ وکلا کی طرح چند روزوعدے وعید اور تعزیتیں ہونگیں ؟
کوئٹہ میں اب تک سینکڑوں بے گناہ افراد کو نشانہ بنایاگیا۔ ایک بنیادی سوال یہ بھی ہے کہ سب سے پسماندہ مگر قدرتی وسائل میں سب سے امیر ترین صوبہ نشانے پر کیوں ہے ؟ جواب واضح ہے کہ پاکستان کو قدرتی وسائل اور گوادر منصوبے کے حوالے سے غیر مستحکم کرنا ہے تو اسی صوبہ کو نشانہ بنایا جائے یہی دشمن کی چال ہے۔ اور ایک ہم ہیں کہ اب بھی سدھرتے نہیں۔اپنے ازلی دشمن کی چالوں کو سمجھتے ہوئے بھی منصوبہ بندی نہیں کرتے۔جبکہ دشمن کوئی موقع ہاتھ سے جانے نہیں دیتا۔ کلبھوشن بھارتی جاسوس پاکستان میں رنگے ہاتھوں گرفتار ہو چکاہے کراچی میں بھارتی مداخلت کے سینکڑوں ثبوت منظرعام پر آچکے ہیں، مگر دنیا کے سامنے بھارت ہی چلّا رہا ہے اور ہم خاموش ہیں۔ہم اگر دبے الفاظ میں الزام لگاتے ہیں تو اس سے ہم بری الذمہ نہیں ہوسکتے۔دنیا کے خوبصورت اور ہر قسم نعمتوں سے مالامال ، بہترین آرمی اور بہترین اسلحے سے لیس پاکستان میں اگر کمی ہے تو لیڈر کی ہے۔ہم پاکستانی قوم جوش سے کام لیتے ہیں ہوش سے نہیں ، ہم سیاسی طور پر بالکل یتیم ہیں۔وہ سیاسی لیڈر جو الیکشن کے دوران بھڑکیں مار مارکر اپنی صفائی اور دیانتداری کے گیت گاتے ہیں اقتدار میں آکرملک کو لوٹنے اور قوم کو دھوکہ دینے میں لگ جاتے ہیں مگر وہی لوگ آئندہ الیکشن میں ہمارے سامنے پارسا بن کر آجاتے ہیں مگر پوچھتے بھی نہیں کہ یہ ’’یہ تو وہی جگہ ہے گزرے تھے ہم جہاں سے‘‘۔پاک بھارت سرحد پر فائرنگ کا کوئی واقعہ ہوجاتا ہے تو میڈیا پر قومی نغمے گونجتے ہیں۔
’’اے وطن کے سجیلے جوانو!، میرے نغمے تمھارے لیے ہیں‘‘ یعنی تم لاکھوں کی تعداد میں ہوتے ہوئے مٹھی بھر دشمن سے مات کھاتے رہو شہدا پر شہدا دیتے رہو اور میں صرف تمھارے نغمے گاؤں۔پھر نغمہ چلایا جاتا ہے ’’ وطن کو ہم عظیم سے ؑ ظیم تر بنائیں گے ہم اپنے ملک کا وقار روزو شب بڑھائیں گے‘‘۔ عظیم تر بنائیں مگر اپنے سجیلے جوانوں کو دہشتگردوں کے ر حم و کرم پر چھوڑیں گے۔ایک طرف وطن کے گیت سن کر جذبۂ حب الوطنی جاگ جاتا ہے تو دوسری طرف کوئٹہ جیسا سانحہ دیکھ کر دل لہو لہو بن جاتا ہے۔ پھر بھی کہا جاتا ہے کہ ’’ ہم زندہ قوم ہیں پائندہ قوم ہیں‘‘ میرے مُنہ سے بے اختیار نکلتا ہے ’’ ہم مُردہ قوم ہیں افسُردہ قوم ہیں‘‘۔۔۔
No comments